20130220-171658.jpg

كنت مع الأهل في مجمع 360 وكنا نتسوق بالمجمع و وقفني واحد كان قاعد في بوث لأحد الشركات وقالي بسآلك سؤال واذا جاوبته صح لك جائزة، قلت له أسأل؟

سألني سؤال وغششني وجاوبت وقالي الحين المدام بنعطيها 3 جوائز عبارة عن كوبون مشتريات بقيمة 1500 دك، تدش أي محل تبيه وتخصمون من الكوبون وتاخذ أغراضك وتمشي والجائزة الثانية عبارة عن اقامة في شرم الشيخ لأربع ليالي وانت ماعليك الا انك تدفع سعر التذكرة! والجائزة الثالثة مادري شنو نسيت والله

المهم سجل بياناتي بظرف وقالي عشان تاخذون الجوائز لازم تروحون مقر الشركة الحين في غني بالاس بجانب بلازا السالمية وتعطونهم الظرف، قلت له اوكي نروح باجر، قالي لا لااااازم الحين ولا تروح عليك الجوائز ومادري شنو، حسيت السالفه فيها ان جنه اهو اللي بيخسر الجوائز مو انا، قلت له اوكي عيل نخلص جم مشوار ونروح هناك، قالي لا لااازم الساعه 6:00 تكون هناك، وقتها كانت الساعه 6 الا ثلث، ولما شافني مو مقتنع قالي وعلشانك بزيد قيمه كوبون المشتريات بخليه لك 1650 دك

وعشان افتك منه قلت له اوكي الحين بروح، ومشت عنه وقلت حق المدام هذيل مامنهم فايده واسلوبهم مو مضبوط أكيد بيستفيدون منا لما نروح الشركة فمحنا رايحين، قالت لي خنروح نجرب موخسرانين شي، وبعد مناقشات قررنا نروح عشان اخلي المدام تعرف سوالفهم واهي معاي احسن عشان لما تمر بهالموقف مره ثانيه تعرف شلون تتصرف

20130220-171721.jpg

توني صافط عند بلازا السالمية ولا يرن تلفوني، وطلع الشخص اللي كلمنا بمجمع 360 داق علي ويبي يتأكد أني رحت هناك، ولما قلت له انا بالمواقف قالي اوكي وانتهت المكالمة

لما دشيت الشركه دق علي نفس الشخص وقالي اسأل عن فلان اخوي وخلني اكلمه عشان اوصيه عليك!! قلت له يبه انا موجود بالشركه اذا تبي توصيه علي دق عليه!!؟ شوي ولا اييني فلان وقالي انا اخو الشخص اللي كلمك حياك الله ومن هالكلام، طبعا المكان مو مريح كلش

20130220-171750.jpg

كان في وايد عوايل غيرنا وبعد دقايق عطتني السكرتيره استماره عشان اعبيها، وطبعا كتبت كل شي غلط لأني مو مرتاح من البدايه، وبعد دقايق يانا واحد وقالنا أهلا بيكم شرفتونا تعالو ندردش واعطيكم فكرة عن الشركه وكذا كذا، المهم قعدنا بصالة كلها طاولات وكراسي وكل طاوله فيها عايله و واحد يشرح لهم واحنا كنا تونا داشين معاهم وقعد الاخ يسولف سوالف عامه وحسيت انه يبي يطيح الميانه، قلت له المهم شنو  عروضكم وشنو سالفه الهدايا والموضوع كله؟ وقام يشرح عن السفر ويسأل جم مره تسافرون وجم تكاليف السفرات ومادري شنو وعرفت أن الموضوع عن التايم شير

قلت له شوف انا بختصر وقتك و وقتي، موضوعكم عن التايم شير؟ اذا اي قولي عشان امشي لأن أنا موالشخص المناسب لكم؟ قعد يلف ويدوووور المهم طلعو يسوقون التايم شير ولما رفضت البرنامج يابلي مديرهم وصارت سالفه عشان نطلع ماسوت علينا والله ضيعو ساعتين من وقتها عالفاضي

20130220-171800.jpg

وآخر شي عطونا الجوائز وعلى قولتهم ماتخرجش وانت زعلان! طبعا الجوائز قيمه جدا مثل ماقال الاخ اللي في 360 اول شي عطر عادي جدا

20130220-171808.jpg

وبعدين الكوبون بو 1650 طلع بس من شركات معينه ماراح افكر بيوم من الايام اني اشتري منهم شي، ويعني مسوي فيني معروف وزايد فيمه الكوبونات من 1500 لي 1650 دك وأصلا الكوبونات مكتوب عليهم 1650 دك

في النهايه احب احذر الكل من هالشركات اللي تستغل الناس وتغريهم بطرق ملتويه، في وايد تفاصيل ماكتبتها، راح يحاولون يغرونكم بأكثر من طريقه منها توثيق العقد من وزاره العدل وغيره، ولما تطلبون منهم اخد العقد للمراجعة خلال يوم واحد راح يرفضون، لان يبون واحد يوقع واهو قاعد مايبون الناس يجيكون عالعقد وينبشون فيه

للمزيد من المعلومات عن التايم شير

howstuffworks

ScamBuster