حادث على طريق الملك فهد


هذا حادث صاير امس الساعة ١١:٤٥ بالليل على شارع الملك فهد مقابل حولي، لما شفته قعدت اسأل نفسي شنو سبب أكثر الحوادث؟ هل القيادة بسرعة أم القيادة مع الشعور بالنعاس أم أخطاء الآخرين أم خلل بالسيارة نفسها؟!؟ شرايكم شنو سبب أغلب الحوادث؟

By | October 31st, 2010|حوادث|3 Comments

إحتراق سيارة في أحد شوارع الكويت

هندي يصور سيارة تحترق في أحد الشوارع، شوفو الدقيقة 1:34 يطلع صوت طلقة أو إنفجار مادري صج شي منفجر ولا المطافي سوو شي بالسيارة !؟

By | August 3rd, 2010|حوادث|0 Comments

موشي تبنجر سيارتك وانت طالع من الدوام

حادث على الدائري السادس

الأسبوع اللي طاف كنت طالع من الدوام ودايس 120 راد البيت، فجأة ولا السيارة اللي جدامي توخر وتلف يسار، ولا تاير مصلوخ وطايح بالشارع، ما مداني أوخر عنه جان أدوسه، عاد سيارتي نازله مو مرتفعه جان أسمع طاااااااخ خخخخخخخ، قمت أمشي وهالصوت موجود خخخخ لول، جان أشغل الفلشر وأصفط على حارة الأمان، طلع كان في حادث كذا سيارة داعمين، شكله بسبة التاير، واللي بالصورة وحده من السيايير ضحايا الحادث، أهما يمكن 3 أو 4 سيايير

حادث على الدائري السادس 2

نزلت من السيارة قلت خل أشوف تحتها أكيد التاير معلق، طلع التاير اللي دسته كسر الغطى مال السيارة من تحت مادري شيسمونه، والغطى هذا قام يحك بالأرض ويطلع صوت مزززعج، بعد ثواني ولا تيي دورية، جان يقولي الشرطي انت معاهم بالحادث؟ قلت له لا بس دست التاير وكسر الغطى و موقادر أمشي بالسيارة، جان يقولي روح سيده أول لفه يمين تلقى دوار ومادري شنو قال المهم آخر شي تلقى بنجرجي، قلت له شالفايده كلهم مصكرين الحين ماتسوه أنطر ساعتين على مايفتح، قلت أمشي فيها بهالصوت و أوصل البيت بعدين يصير خير، قمت أمشي 60 لما وصلت، رحت البيت وسويتها عند البنجرجي مال منطقتنا، اليوم اللي وراه ولا أحس السيارة تعري .. ولييين

حادث على الدائري السادس 3

طليت تحت ولا التاير مشقوق شوي، الشق اللي شفته طوله 5 سم تقريبا، رحت شويخ عشان أبدل التاير، لما شالو التاير جان أشوف الشقه اللي فيه ( اللي بالصورة ) ويهي صار جذي @@ قلت زين ماصار فيني شي وانا قاعد أمشي فيه، المهم بدلته وافتكيت، مشاوير صيانة السيارة من أخيس المشاوير اللي تمر علي لأنها متعبه ومكانها بعيد و تعال انطر دورك و لويه، أعرف واحد من الشباب يحب صيانة السيايير و شويخ وهالسوالف، لما أقوله أمش معاي بروح شويخ أسوي سيارتي يستااانس جني قايل له عازمك على سينما لوول

By | May 23rd, 2010|حوادث|0 Comments

حادث ويه بويه على شارع الخليج

حادث على شارع الخليج

 اليوم العصر كنت مار على شارع الخليج، جان أشوف حادث مأساوي بين جيب و وانيت

حادث على شارع الخليج 2 مادري شلون داشين أبعضهم، أثنينهم مدعومين من جدام !! .. في واحد كسر خاطري كانو منومينه على الحشيش وره الوانيت جنه متعور، الحادث مبين أن صارله فترة بس ماكو لا دورية ولا إسعاف عندهم، بس ليلحين مو مستوعب شلون داعمين بعض من جدام !؟ يعني الوانيت كان ماشي عكس السير ؟ ماكو إلا هالتفسير

By | May 17th, 2010|حوادث|14 Comments

وفاة طفل بسبب لعبة في مشرف

القليلبة في ألعاب مشرف

لعبة الوزات في ألعاب مشرف

بعد ماقريت الخبر في بلوق فرانكوم ( هنا ) مريت ألعاب

مشرف مع صاحبي عشان نشوف المكان ، كنا متوقعين

أن الياهل طايح من القليلبة مثل ماهو مكتوب بالجريدة

بس لما وصلنا عند الألعاب لقيناهم مصركين المكان

وشفنا الحارس المصري وسألناه عن الياهل وقلناله أهو

طاح من أي لعبه ؟ جان يأشر على لعبه الوزات الصغيرة

ويقولن أن الياهل طاح منها و توفى الله يرحمة !! بس

كلامه مايدش المخ كللللش ، يعني لو أي أحد يطيح من

لعبة الوزات جان نكسرت ريله أو إيده بس مو يتوفى !!؟

المهم الحين أهما مصكرين اللعبة و موعارفين متى يفتحونها

By | March 1st, 2010|حوادث|0 Comments

منع بيع المسدسات

بعد الخبر اللي نشرته جريدة الوطن عن البنت اللي

حاشتها طلقه على عينها من مسدس لعبة وبغت

تنعمي بس الله ستر لأنها كانت لابسه نظارة طبية

ونكسرت عدسة النظارة فقوة الطلقة ماكانت قوية

على عينها ، و أعلنت وزارة التجارة منع بيع هالنوع

من الألعاب حماية للمستهلكين من هالمواد الضارة

 

المفروض هالقرار من زمان يطلع ، أتذكر قبل كنا نسوي

فريقين بالفريج و نتطاقق بهالمسدسات لول بس الحمدلله

محد حاشة شي لأن هالمسدسات بوطقه كنا لما نطق

سيده تروح الطلقه يمين أو يسار لوو شنو ماتروح سيده لول

منع بيع المسدسات

منع بيع المسدسات

By | January 27th, 2010|حوادث|0 Comments

خذيت مكاني .. أخذ إعاقتي

كنت أدور موقف الأفينيوز و لقيت موقف يم مواقف المعاقين

جان أشوف جيب صافط بموقف المعاقين وحاطين له نوته

على الدريشة .. قربت عشان أقره النوته وكان مكتوب فيها

دام خذيت مني مكاني أخذ مني إعاقتي” كلام مؤثر من صاحب”

النوته ، في ناس مايستحون ومايقدرون ظروف ذوي الإحتياجات

 

الخاصة ، هالموقف يذكرني بأيام الجامعة لما صاحبي كانت

ريله مكسورة وكان يمشي على عكازين و بيصفط عند المعاقين

بس مالقى موقف فاظي .. صفط بعيد وقام يمشي لي باب

الجامعة وهو بطريجة جان يشوف بنية تمشي وتركب سيارتها اللي

صافطتها بموقف المعاقين ، عاد صاحبي لما شافها جان يستلمها

ويزفها زف يقولها أنا مو قادر أمشي مخليتني أصفط بعيد وانتي

مافيج شي صافطه مكان المعاقين ، عاد البنت صار ويهها طماطه

دام خذيت مكاني أخذ إعاقتي

دام خذيت مكاني أخذ إعاقتي 2

By | January 18th, 2010|حوادث, مدهش|0 Comments