قبل جم يوم مريت الأفينيوز بعد الفطور وطبعاً الزحمة موطبيعية على المواقف، قعدت أفتر بالمواقف 20 دقيقة، قلت لو رايح حق الفاليه أسرع، جان أشوف هندي راكب جيب و واقف بالموقف و توه نازل من السيارة بروحه، جان أقوله تعال يبه أخذ 0.5 دك وعطني الموقف، قالي لا عطني 1 دك وأطلع من الموقف لول، شكله خبره في تبادل المواقف، عطيته 1 دك وريحت بالي وصفطت مكانه قلت أحسن بدال لا يظيع الوقت وانا أحوس بالمواقف، والهندي شكله راح يدور موقف ثاني ويدور واحد ثاني يعطيه 1 دك، صار عنده سمول بزنس بدون راس مال لول
سؤال للمدونين: شنو يكون موقفكم لو تفرض الحكومة ضرايب على المدونين لممارسة نشاط التدوين؟ هذا مو خيال، بالعكس هذا اللي حاصل في فيلاديلفيا اللي تقترح فرض ضرايب على المدونين اللي يدونون بهدف تحقيق أرباح من الإعلانات أو بيع سلع و منتجات مختلفة، وتشرط عليهم الحصول على رخصة للعمل كمدونين!! التدوين صار مصدر إعلامي غير رسمي في الكثير من الدول، و وايد شركات قامت تحسب لهم حساب وتحطهم ضمن خططها التسويقية – المصدر
المطعم الصيني “ب ف جانقز” في الأفينيوز شال الحصن اللي كان حاطهم عند المدخل من فترة، الحصن كانو معطين شكل حلو حق المدخل بس مادري ليش شالوهم!؟ أحس في شي ناقص بالمطعم، جنه لما واحد يطيح ضرسه ويحس أن في فراغ كبير مكانه، شرايكم بالتشبيه لول
تحدث الفنان خالد أمين عن دوره في مسلسل زوارة خميس وعن حالة مرزوق الذي يعاني من مرض معين سيتم الكشف عنه لاحقاً، بالإضافة إلى رأيه في نقد هذا العمل الدرامي
إدارة جمعية الروضة حاطه حماية مزدوجة حق مدخل أحد الفروع، وتم اعتبار العواميد من ضمن التعديات، صراحة بما أن الحواجز البيضة (اللي فوق الرصيف) موجودة فوجود العواميد غير مجدي
كلنا شفنا إعلان مسابقة شركة زين المبدعة بدعاياتها، بالنسبة حق هالإعلان أول ماشفته عبالي لازم نختار الإجابة الصحيحة على السؤال اللي يقول من هي بنت أميمة؟ بس بعدين فهمت أن المطلوب من هالإعلان هو التصويت للبنت اللي تبونها تكون بنت أميمة، يعني ماكو إجابة صحيحة، فقط إختارو البنت اللي تبونها تكون بنت أميمة، هذا معناته وعلى حسب توقعاتي أن المسلسل ماخلص تصويره! يعني بيشوفون شنو يبون الناس وبعدين يكملون القصه على حسب مايطلبه المشاهدون، إذا كانت توقعاتي صحيحة فهذا يدل على عقلية عبقرية من القائمين على تسويق هذا المسلسل، على فكرة تره في سحب يومي على جهاز بلاك بيري للمشاركين في التصويت، وبعد التصويت راح يسوون لقاء بين الممثلات والأشخاص المشاركين بالتصويت
كنت طالع بالسيارة وقاعد أسمع برنامج المسابقات مال دغيشم على مارينا أف أم، جان تشارك وحده قالها دغيشم يا هلا أم وحش!!!؟ ليش مسمين الولد وحش!!؟ في ناس يبون أسامي خشنة حق عيالهم تدل على الخشونه والرجولة، مثل صقر، نمر، شاهين، ذيب، بس وحش هذا يديد وخلا كل الأسامي الباجية لطيفة مو خشنة لول!! وجذي يتعقد الياهل مسكين خصوصاً أن هالأسم يدل على الشر في الألعاب الإلكترونية والأفلام الكارتونية، وأختم بالمقولة اللي تقول لكل أسم من مسماه نصيب
ولد خالي قالي أن عنده خرده ويبي يحولهم حق أوراق بس موعارف شلون! قلت له روح الجمعية ويصرفونهم لك، جان يقولي الجمعية راح يطولون على مايعدونهم لأن الخرده وايد، وده يروح البنك لأن سمع أن بالبنك يحطون الخرده بالميزان ويحسبونهم على حسب وزنهم، يعني مايحتاي يعدونهم حبه حبه، جان أقوله ليش جم عندك أنت عشان يوزنونهم؟ جان يقولي عندي 70 دينار خرده هههه، والحين يبي أسهل وأسرع طريقه عشان يحولهم حق أوراق، منو عنده الحل؟