بت كوين، هو أسم العملة الإلكترونية واللي تسمح للأفراد بتبادل الأموال بشكل إلكتروني بدون وسيط (بدون بنك أو حكومة أو جهة رسمية) وبجذي راح تقل التكاليف على المشاريع الإلكترونية لعدم وجود عمولة للوسيط، واللي فهمته من موقع العملة أن هذا مشروع إلكتروني مفتوح المصدر ويبدأ استخدامه بشكل بسيط في شراء الكتب والمنتجات الإلكترونية (برامج وغيرها) وراح تتوسع العملة مع الوقت
وهذا فيديو قصير يشرح العملة ومميزاتها .. موضوع العملة الإلكترونية ذكرني بموضوع كتبته بالمدونة سنة 2009 بعنوان (العملة الخليجية الموحدة) وهذا جزء من الموضوع نسخته لكم
—————–
يقولون في المستقبل ماراح يكون في شي أسمه عملة، الفلوس راح تكون إلكترونية والبنوك إلكترونية، والحين نشوف أوروبا كان عندهم كذا عملة و وحدو عملتهم وصارت اليورو، والخليج كان جم عملة والحين بتصير عملة وحده، بعدين يتحدون دول العالم و تصير العملة الإلكترونية!! تتوقعون يصير هالشي؟ الله يستر
كنت رايح مشوار وكل مرة أمر على راعي البرد بطريجي وأسلم عليه بدقه هرن، وآخر مرة كنت بسلم عليه جان أشوفه يأشر حق الطرف الثاني من الشارع ويصارخ، قلت شفيه هذا شسالفته!؟ التفت الصوب الثاني ولا ياهل قاعد يسوق قاري بو ثلاث تواير بالشارع والسيايير تشخط يمه، صراحة كان المشهد يخرع وخفت لا يصير شي بالياهل جان اطق فوق تحت علشان الحق عليه وأوخره عن الشارع
على ما طقيت فوق تحت ولا راعي البرد ماقصر صبقني وخذه الولد ورجعه صوب الرصيف والظاهر أن وصله بيتهم، مشكله هاليهال مايحسون بخطورة الشغلة اللي يسوونها، الحمدلله قت سليمه على قولتهم
ليش لما نشتري اغراض من الجمعية يقسمون الأغراض بأكثر من جيس؟ حتى لو كانو الأغراض شوية، هالشغلة مزعجة ويخلونك تشيل أكثر من جيس وقاعدين يصرفون كمية كبيرة من الجياس يومياً، ياريت كل جمعية توصي العمالة اللي فيها أن يقتصدون بهالجياس ويستعملونها بشكل معقول وراح يشوفون أن ميزانية الجياس السنوية بتكفي حق سنتين
يناقش الأخ عبدالله الصالح موقف حصل له مع أحد زملائه عندما طلب زميل عبدالله من عبدالله أن يغششه بأحد الإمتحانات، وكيف استطاع الصالح أن يرد عليه برد منطقي، ولكن للأسف أصبح موضوع الغش أمر طبيعي و واجب بين الشباب في هذا الزمان، من منا طلب زميله أن يغششه ورفض الآخر هذا الطلب ؟
هاليومين قمت أكتب باستخدام الورقة والقلم أكثر من قبل لظروف العمل اللي تتطلب مني الكتابة، ولاحظت أن إيدي ثقيلة بالكتابة طبعاً أكيد لأني من زمان ماكتبت فقرة طويلة بالورقة والقلم لأن قمنا نستخدم الكيبورد أكثر، طبعاً والخط الله بالخير تغير عن قبل نوعاً ما وكنت أفكر هل الكتابة بالكيبورد شي سلبي ولا إيجابي؟
في البداية كنت أقول أن سلبي لأن يأثر على أعصاب الأصابع مع الوقت ومرات الواحد يحس أن إيده أو جزء معين منها يرجف شوي من كثر التعب، لكن بعد تفكير عميق لقيت أن استخدام الكيبورد والكمبيوتر شي إيجابي لأن خط الكمبيوتر ممكن أي أحد يقراه أما خط الإيد غير، مرات اللي كاتب بإيده مايعرف يقرا شنو كتب
غير جذي قاعد نوفر ورق عن طريق الكتابة بالكمبيوتر وبجذي نحافظ على البيئة، وممكن تعديل الأخطاء الإملائية بسهولة بالكمبيوتر
نرجع حق موضوع ثقل الإيد بالكتابة، قلت خل أشوف شنو أسرع لما أكتب بالكيبورد ولا بالقلم، ودشيت موقع سبيد تيست وسويت إختبار لسرعة الطباعة وهاذي النتايج بالصورة، 35 كلمة بالدقيقة، وشغلت الساعه وحسبت سرعة كتابتي بالقلم والحمدلله طلع نفس الشي وإذا فرق بيكون بكلمة وحده أقل، جربو سرعة طباعتكم وقولولنا جم سرعتكم بالتعليقات
يتحدث الأخ عبدالله الصالح عن موضة البنطلونات والتي تسمى باللو ويست، والتي تكشف الملابس الداخلية للشباب وقد أثار هذا الموضوع حفيظته فبحث عن مصدر هذه الموضة و وجد أنها من أصول أمريكية، فقد كان السجناء يلبسون البنطلون من غير حزام لأنهم كانو يضربون الحرس بالحزام فمنعوه عنهم، وبعد خروجهم من السجن أصبحوا يلبسون ملابسهم بالشكل الذي اعتادوا عليه، أي بدون حزام، ليبينوا أنهم من أفراد العصابة المسجونه، والآن للأسف نجد بعض الشباب بالوطن العربي يقلدونهم بهذه الملابس
