أمس كنت متواجد بمسرح كيفان لتغطية مسرحية الأطفال (العبها غير) من تنظيم فريق وصال الإعلامي و تمثيل مجموعة من الشباب والأطفال، تدور أحداث المسرحية عن طفل يلعب دايماً بالآيباد بكل مكان حتى بالمدرسة، وربعه يقولون له بسك لعب، في وقت للعب و وقت للدراسة، ويعصب ويكسر الآيباد وبعدها يدشون بعالم الآيباد وتطلع لهم برامج وألعاب مختلفة ويبينون لنا شنو الشي المفيد والضار بالآيباد

وهذا أول مشهد بعد دخولهم للآيباد ويلقون لعبه أنقري بيرد اللي تضيع وقت بدون فايدة وشلون يتخلصون منها.. شي ممتع والشباب مبدعين صراحة، خصوصاً الأطفال المشاركين هذيل قمممة الروووعة ماشالله عليهم.. أخليكم مع بعض الصور قبل وأثناء العرض

شخصية تويتر اللي تتكلم وايد ويمثلها مشاري المجيبل، والدرس اللي وجهوه للأطفال أن في تويتر ينقال الكلام الزين والشين، ولازم الواحد يفكر ويعرف وين الصح

شخصية قوقل المسيطر على النت كله

شخصيات المسنجر، واحد تكانه ويحب الخير والثاني نجري يحب الشر

بابا سنفور مع الطالب فهد اللي دش بالآيباد

الطفل عبدالعزيز الراشد (على اليسار) بدور “فهد” في مشهد استعراضي

المسرحية بإشراف الشاب محمد الحملي صاحب مجموعة باك ستيج قروب

الحملي يشكر الشباب والأطفال على مجهودهم بعد العرض ومنهم (خواطر سليمان، عبدالعزيز الراشد، رناد الطوق، مشاري المجيبل، فهد الرويشد، فجر العبيدان، مشعل الفرحان، بدر البناي، لين الزيادي و حامد محمد)، المسرحية جداً جداً ممتعة وجميلة وهادفة وأنصح فيها للعوايل والأطفال، تعرض المسرحية بالويك أند إعتباراً من 5 إلى 7 أبريل، العرض الأول 5:00 والعرض الثاني 7:30 والفترة الثانية للعرض من 12 إلى 14 أبريل بنفس مواقيت العرض

أسعار التذاكر 5 دك للعوايل و4 دك للشباب – الشباب في البلكونه فقط

للحجز: 97547705