ذهبت للتسوق بأحد الفروع بمنطقة الروضة و وجدت أحد الشباب يريد التسوق داخل الفرع مع كلب كبير الحجم، من الواضح أن الكلب أليف لكن الداخل والخارج ينظرون إليه ويحاولون عدم الإقتراب خوفاً منه، طبعاً حارس الأمن أنتبه لوجود الكلب وتدارك الموقف وأخرجه خارج الفرع بسرعة
أعاني من بداية الإنفلونزا، توجهت اليوم إلى الصيدلية لشراء بانادول كولد آند فلو الأصفر فأعطاني الصيدلي العلية الخضراء وقال لي بأن تأثيرها أقوى من العلبة الصفراء، سأتناول حبة الآن وأطلب من الله أن تختفي أعراض الإنفلونزا المزعجة لأتمكن من كتابة المواضيع لكم بشكل أفضل
واحد من الشباب يعشق المحركات بشكل جنوني وخصوصاً محركات السيارات، وفي يوم من الأيام كان متضايق شوي، وعشان يرفه عن نفسه طلع بسيارته وانطلق بسرعة 328 كم، لما وراني صورة العداد قلت له الحمدلله أني ماكنت معاك!! أنا حدي 180 ومرات أحس أن السيارة بتزلق فيني بعد لول
كنت بعبي بانزين جان إيي سيكل عكس السير ضارباً طابور السيايير عرض الحائط على قولتهم، جان يعبي بانزين عالسريع ويمشي!! بعدين إكتشفت إنه سيكل هارديز.. على العموم انشالله يوصل الطلب حار وبالوقت
اليوم كنت بالديرة نازل بالأصنصير من أحد الأبراج التجارية، وأنا داخل الأصنصير فجأة اشتغلت صفارة إنذار الحريق، طلعت علامة “فاير ألارم” بشاشة الأصنصير وهو قاعد ينزل فيني، على طول شفت تلفوني إذا فيه سيرفس ولا لا، قلت إذا صار ماصار بدق على الشرطة، بس الحمدلله نزل فيني وفتح الباب وطلعت، ومادري هل صج في حريجة ولا بالغلط، المهن لما وصلت السيارة تذكرت أن رقم الشرطة 112 وأنا كنت بدق على 777 لول، الحين اللي يدق على ثلاث سبعات شنو يطلع له!؟ المفروض يحول على الشرطة ويكون شغال
بالفترة الأخيرة كل ما أدش موقع السينما أبي أحجز حق فلم وأوصل حق صفحة إختيار المقاعد (شباب أو عوايل) أسمع صوت لحن يشتغل ثانتين أو 3 ويسكت، اليوم قعدت أحوس بالموقع وقعدت أدور مصدر الصوت من وين؟ لما اكتشفت أن الصوت يطلع من إعلان بنك الخليج اللي فوق، ولما ضغطت على زر الصوت اللي مأشر عليه بالسهم قام يشتغل الصوت مرة ثانية! هالصوت شوووي مزعج بس اعتقد أن البنك حاطينه متعمدين لأسباب تسويقية
اليوم مداوم من الصبح لي ٣ بعدها دشيت اجتماع لي ٤ وبعدها خذيت شور ودشيت اجتماع ثاني من ٧ لي ١٠ لا غدا ولاهم يحزنون، بطني قام يزقزق لول الحين يبيله ماكدونالدز ومجابل تلفزيون لما تخلص بطاريتي وأنام وأحلم شبيصير بالأسبوع الياي لأن احتمال تصير تغييرات حلوة انشالله
Loading ...