بالفترة الأخيرة كل ما أدش موقع السينما أبي أحجز حق فلم وأوصل حق صفحة إختيار المقاعد (شباب أو عوايل) أسمع صوت لحن يشتغل ثانتين أو 3 ويسكت، اليوم قعدت أحوس بالموقع وقعدت أدور مصدر الصوت من وين؟ لما اكتشفت أن الصوت يطلع من إعلان بنك الخليج اللي فوق، ولما ضغطت على زر الصوت اللي مأشر عليه بالسهم قام يشتغل الصوت مرة ثانية! هالصوت شوووي مزعج بس اعتقد أن البنك حاطينه متعمدين لأسباب تسويقية

كنت طالع مع واحد من الشباب وقالي أن احنا الحين بشهر 10 ممم قلت له أوكي؟ شنو يعني؟ جان يقولي يعني صارلك سنة من فتحت المدونة، أنا صار فيني جذي @@ !!!؟ لول  والله ماحسيت فيها، الوقت مر بسرعة وبغمضة عين!! من لا يشكر الناس لا يشكر الله، وبهالمناسبة حبيت أشكر كل الزملاء اللي وقفو معاي في بداية مشواري في عالم التدوين وأخص بالشكر الإخوان

248am.com & Frankom.com

اللي كان لهم دور كبير في التشجيع والمساندة، وأشكر الديزاينر اللي تعبني معاه عشان نسوي الديزاين لول أهو عارف نفسه وماقدر أذكر أسمه لأنه يحب الخصوصية،وكذلك ما أنسى المبرمج اللي مظبطلي المدونة كلها من الناحية الفنية، يعطيكم ألف عافية.. أتمنى للجميع الإستمرار في هذا العالم الرقمي الممتع، وتحياتي لكم

مريت بيت الأهل ولا أشوف كرت معلقينه على ورقة الشجر بالحديقة، شكله المندوب ماله خلق يوصل عند الباب ويحطه عالباب، على العموم خل يعلقه على أوراق الشجر أريح له ولنا لأن هالنوع من الإعلانات مزعج والناس بشكل عام يحاولون يتجنبونه

أمس بعد ماطلعت من زوارة الخميس ( هاذي زوارتنا مو مالت المسلسل لول ) الساعة 11 بالليل قلت خل أروح سينما المارينا وأشوف الأفلام الموجودة، طلع ماكو إلا 3 أفلام وكلهم بايخين بس قلت يالله واصل واصل خل أدش أي شي، و وقع الإختيار على اللمبي 8 جيجا، مع أني ماحبه وماشفت له إلا فلم واحد وماكان ذاك الزود صراحة، المهم بعد ماشرينا التذاكر قعدنا صوب المطاعم فوق ننطر الفلم اللي كان المفروض يبدي الساعه 12:15

وقبل لا يبدي الفلم بنص ساعه شفنا تقريبا 6 أشخاص من رجال الشرطة صاعدين فوق مع بعض جنهم لاحقين واحد، وكل واحد فيهم قاعد يقول حق المطاعم يالله صكرو بسرعة، وقالو حق الناس اللي قاعد يتعشون يالله قومو طلعو بسرعة، طبعا احنا موفاهمين شالسالفه!!؟ ولا كل المطاعم يصكرون شتراتهم، جان أقول خل ألحق على الفلم لايكون بيصكرون السينما بعد!!؟

رحت السينما ولا مو راظين يدخلون أحد، جان أقول حق المسؤول لوسمحت انا حاجز حق فلم بيبدي بعد شوي، قالي خلاص تكنسلو الأفلام كلهم وقاعدين يطلعون الناس اللي داخل صالات العرض، انت خل تذكرتك عندك و باجر روح أي سينما يبدلونها لك!! قلت له ليش شالسالفة؟ جان يقولي في بلاغ، وبعدين جابل الشرطة، أعتقد قصده بلاغ عن قنبلة وكالعادة يطلع بلاغ كاذب، والله أذونا بهالبلاغات قامت تظايق المواطنين مو بس الداخلية،ولما طلعت من السينما ولا عمال التنظيف ميمعين الكراسي ويقومون الناس

وصارت يمعه بره المجمع، أكثرهم الشباب الصغار اللي يايين بتكسي أو بالسايق وناطرين أحد ياخذهم.. وانتهى اليوم بالتمشي بالسيارة مع عصير بارد عشان يعدل المزاج، وهاليومين بشوفلي يوم أروح فيه السينما وبغير الفلم لول