اليوم رحت قراج “طبيب الزجاج” لتصليح زجاج السيارات المخدوش والمكسور، ومثل ماتشوفون بالصورة الزجاج الأمامي كان مخدوش خدش طوله 2 سم تقريباً

الخطوة الأولى أهي حفر آخر نقطة بالخدش علشان لايكبر أكثر

بعدها يحطون مادة مثل الماي ويلزقون لزاق خاص على الخدش

بعدها يحطون هالجهاز عشان يذوب اللزاق ويعبي الفراغات

يقعد هالجهاز شغال 20 دقيقة تقريباً وبعدين يحكون الزجاج بموس عشان يوخرون الزوايد

وهاذي الجامة بعد التصليح، راح الخدش بنسبة 90% تقريباً يصير مكانه جنه شعره ماتبين إلا حق اللي عارف أن الجامة كانت مكسورة من قبل، سعر التصليح كلفني 8دك

هاذي الخريطة حق اللي حاب يزور المحل، شارع كندادراي، يمين قبل ماكدونالدز، آخر الشارع يسار، مقابل سن سيتي

كانت لي تجربة ممتعة في تشوكليت بار في سبونز بالمهبولة، كانت الطاولات اللي بره كلها مفوله لأن الجو كان حلو، فماحصلت مكان إلا داخل وطلبت سلطتي اليونانية المفضلة، أحلى شي فيها جبنة الفيتا

بعدها يابولنا البطاط المقلي مع الكاتشب وكان طعمه ممتاز ومطبوخ بشكل جيد

سندويج التركي لذيذ جداً مع تقليل فترة التوستر لأن ماحبه يابس

سندويج الموزاريلا يقدم مع الخس بصلصة حامضة والبطاط

كيكة البراوني اللذيذة جداً جداً، أنا ما آكل حلو وايد بس هالكيكة خلصتها كلها، أنصح فيها وبشدة

توني طالع من فلم “را ون” بطولة شاروخان، قصة الفلم عن مبرمج ألعاب ولده زهقان من الألعاب السهلة واللي يفوز فيها بسهولة، فيحاول يراضي ولده ويصمم له لعبة يكون فيها الشرير قوي ومايموت بسهولة

ومن قوة الشرير وبرمجته الذكية يطلع من اللعبة ويلاحق ولد المبرمج عشان يذبحه لأسباب معينة، الفلم طبعاً خيالي وايد وتقييمي له بشكل عام 4/10

تقرير مصور عن كتاب “كراش إت” مثل ما وعدتكم راح أتكلم عن الكتاب بتفصيل أكثر، نشوفكم تاريخ 25/10/2011 إنشالله

قريت كتاب “كراش إت” قبل فترة وحبيت أعطيكم فكرة عن جزئية اعجبتني في الكتاب، بجابتر 7 تكلم مؤلف الكتاب “قاري فاينرجك” عن التركيز على المشروع وغض النظر عن التفاصيل اللي ممكن تأخر المشروع وتعطل سيره، والحلو بهالنقطة أنه يحث على العمل المستمر بدون توقف، لما أفكر بهالجزئية أتذكر نفسي لما أنوي أشتغل على كذا شغله ويتعطل شغلي لأني أبحث عن الكمال والكامل الله سبحانه، لا للكمال التام ونعم للعمل والإنجاز، التفاصيل عن تجربتي مع الكتاب راح تشوفونها مصوره قريبا.. خلكم معانا

إضغط هنا للمشاركة بندوة كراش إت

أمس كانت سهرتي مع المسرحية الكوميدية “الطرطنقي” – وكلمة الطرطنقي تعني الشخص عديم الفائدة أو الشخص المهمش، وتدور أحداث المسرحية حول شخص فقير جداً يسكن بشقة صغيرة مع عائلته ويزوره صديقه القديم ليعرض عليه الزواج من فتاة مليارديريه ليستغلوا مالها لصالحهم، وتبدأ الأحداث وطبعاً كل هذا بإطار كوميدي جريئ، وتقييمي للمسرحية من الناحية الكوميدية هو 6/10 على عكس مسرحية بخيت وبخيته التي أقيمها بدرجة 9/10 وربما يعود ذلك لغياب بعض النجوم الذين اعتدنا عليهم من مثل الفنان أحمد فرج و مبارك المانع، كما أن رسالة مسرحية بخيت وبخيته كانت واضحة مقارنة مع رسالة الطرطنقي، وفي النهاية أشكر جميع العاملين على هذا العمل ليسعدوا سكان دولة الكويت

حصلت على فرصة لحضور حفلة ليالي فبراير الأسبوع اللي طاف، وكانو نجوم الحفلة حمود ناصر،ديانا كرزون،فايز السعيد وبشار الشطي، وقتها وصلت متأخر ومالحقت على حمود ناصر والباجي كلهم كان أداءهم حلو لكن ديانا كرزون كان أداءها رائع جداً مع أني أول مرة أسمع لها

قدرت آخذ بعض الصور وعجبتني حركة أن كل مطرب ممكن يعطي فرصة لأحد الشباب علشان يطلع على المسرح وعطى بشار فرصة لبدر الشعيبي علشان يغني معاه على المسرح وهاذي نقطة تحسب لبدر الشعيبي

نجم الحفلة بالنسبة لي كان الإعلامي سعيد المعمري، أسلوبه رائع جداً في تقديم المطرب فايز السعيد ماشالله عليه

فايز السعيد كان أداءه حلو وعطى فرصة لأحد الشعراء الإماراتيين أن يلقي الشعر على المسرح وكان الشاعر كفيف وألف شعر حق الكويت في نفس اللحظة ماشالله

حفلة اليوم فيها ماجد المهندس، يارا و وعد – لحجز مقاعد الفي آي بي 94002999 وأشكر شركة “زين” على هذه الدعوة

أمس شفت فلم توي ستوري 3 ، المقدمة كانت قوية والقصة روعة وأحداثها غير متوقعة، مدة الفلم 1:45 دقيقة تقريبا و طول هالفترة كنت مندمج، من المشاهد الحلوة لما باز يتكلم أسباني لوول لازم تشوفونه، بالأجزاء القديمة كانو يترجمون أسم “باز يطير” يكتبونه “بظ يطير” لول بس الحين عدلوها خلوها “باز” ، لما رحت الفلم كنت متوقع أن في حركات 3 دي قوية مثل أفلام المركز العلمي، بس حسافة توي ستوري 3 دي عادي مافي صور تييك بويهك وتخرعك لول

هذا تريلر توي ستوري 3 ، أعطي الفلم 10/10 يستاهل