فلم درايف من الأفلام التي تعرض في سينما الكويت، تدور أحداث الفلم عن سائق يمثل المشاهد الخطرة في الأفلام مثل المطاردات وتقلب السيارات، وبعد الظهر يساعد العصابات في سرقاتهم حيث يلعب دور السائق الذي يساعدهم على الفرار من الشرطة بعد كل سرقة تحدث، فكرة الفلم جيدة ولكن الإخراج تعيس جداً والفلم كئيب و ممل لدرجة كبيرة، هناك فترات سكوت طويلة بالفلم ولو جمعنا الوقت الذي يتحدث فيه البطل لوجدنا أنه 10 دقائق فقط، الخلاصة.. لا أنصح بمشاهدته بالسينما ولا في المنزل

إنتشر هالخبر بسرعة هالفترة، وناس يقولون إشاعة وناس قالو أن هاذي سيدة الأعمال فلانة وغيرهم قالو هذا رجل الأعمال فلان

وهاذي بعض التعليقات اللي اعجبتني في تويتر واللي كانت تتكلم عن هالموضوع، انزين السؤال يقول لو فرضنا أنك أنت عندك 800 مليون دك، هل تسويها وتخطو هالخطوة وتعزم مدريد مقابل نص مليون!؟

نقاش حول إمكانية فوز منتخب الكويت الوطني على ريال مدريد في مباراة اليوم، وعرض لتوقعات الشباب، منهم من يتوقع فوز مدريد ومنهم من يتوقع فوز المنتخب، الفيديو يناقش هذا الموضوع بأسلوب كوميدي وهو من تقديم علي مبارك و مجموعة من الشباب

 قررت أجرب موقع طلبات بعد ما حترت من وين أطلب فقلت أتصفح الموقع وأكسر الروتين شوي، وشفت أن طلبات عندهم إيجابية وسلبية

بالنسبة للإيجابية: عجبتني سرعة عملية الطلب بالموقع، كنت خايف أني أكون ناسي اليوزر والباسوورد لكن بعد ما اخترت المطعم طلعلي خيارين، يا أني أدش باليوزر مالي أو أشتري بدون اليوزر وأحط عنواني وبياناتي من أول، وطبعاً حطيت بياناتي من أول لأن مالي خلق أتذكر اليوزر والباسوورد وهالشي خله الطلب يكون وايد أسرع

وبعد ماطلبت طلعت لي هالصفحة (اللي فوق بالصورة) تقولي أن الطلب يبيله من 45 إلى ساعة عشان يوصل! قلت جنه وايد والمطعم بالمنطقة اللي يمي! يالله طاف شكله سستم مبرمج على هالوقت

وهني تبدي السلبية: بعدها بدقيقة دقو علي طلبات عشان يتأكدون من الطلبية، حلو.. من حقهم عشان لحد يلعب عليهم، وبعد أنا مو داش من اليوزر، أتوقع لو أدش عاليوزر مالي ماراح يدقون، المهم تأكدو من الطلبية وبعدها بدقيقة دقو علي طلبات مرة ثانية يقولون لي أن الطلب بياخذ من ساعة ونص إلى ساعتين!! قلت له ليش شدعوة!!؟ والمطعم يمي! قالي لأن زحمة واحتمال يتأخر! قلت له أوكي ماشي، وبعد دقيقة دقو طلبات مرة ثالثة وقالولي تره الطلب بيتأخر من ساعة ونص إلى ساعتين! قلت لهم توكم داقين وبلغتوني من قبل!! قالو آسفين ماعليه بالغلط! و وصلني الطلب بعد ساعة وربع والأكل بااارد ماينوكل، فهل طلبات يتأخرون بتبليغ المطعم بالطلبية؟ أو مطعم هيلث ستوب بطيء في تسليم الطلبات

اليوم كان في حادث بين باصين على شارع فحيحيل في إتجاه الديرة، الحاذث غريب ومو متخيل شلون صار بين الباصين، معقوله راعي الباص اللي وره ماشاف الـ “باص” اللي جدامه!!؟ ومشكلة الباص أن مسطح من جدام و وره، عشان جذي لما تداعمو راح الزجاج الأمامي كله

وهاذي صورة تبين الخفسة بالباص اللي جدام، الشرطة والإسعاف كانو موجودين و يعطيهم العافية سوو اللازم

يتني فكرة وأنا أشرب فيتامين سي بالدوام، أقراص فيتامين سي لونها وطعمها مشابهين إلى حد كبيير للميرندا أو الفانتا، وممكن تقدمونه للأطفال على أنه مشروب غازي بدون لا يدرون أنه فيتامين مفيد لهم، لأن بعض اليهال من يعرفون أنهم بيشربون أو بياكلون شي مفيد يكرهونه على طول

شكل الغازات بالفيتامين يعطي إيحاء أن اللي يشربونه صج ميرندا، وإذا اليهال يستانسون على الأقراص الفواره ويحبون يشوفونها تفور خير وبركة ومايحتاي سالفة الميرندا لول

كنت أتطمش بالسوق وأشوف جم شغلة حق فارس وطحت على هالرضعة اليديدة، شفتها مغلفة بروحها وغير عن الباجي قلت أكيد فيها شي غير

خذيت الكرتون وقريت المكتوب عليه (تساعد على تهدئة طفلك خاصة في الليل، مغص أقل) وطبعاً اللي عنده عيال يعرف معاناتهم مع المغص والغازات، و ماشالله عليهم اليهال مايحوشهم مغص إلا بالليل ويصير شعارهم (سهرتنا الليلة خلوها صباحي) وإذا شد معاهم المغص يقولون لك (مافي نوم بعد اليوم مافي نوم) عشان جذي قررت أشتريها ونجربها

طريقة عمل هالمنتج تعتمد على إدخال الهواء الخارجي إلى داخل الرضعة أثناء شفط الطفل للحليب أو غيره من السوائل وبهالطريقة تقل الغازات اللي تدخل بجسم الطفل

سعر المنتج 4.250 دك عند ماذر كير ، يعتبر غالي بالنسبة حق الرضعات ( في الغالب سعرهم 2 دك تقريباً) لكن تسوه السالفة إذا تخلي الياهل يتخلص من المغص والغازات

جنجفة من إنتاج شركة سيركس بي سي للدعاية والإعلان، تتميز هذه الجنجفة بأنها مرسومة يدوياً وتحمل أسماء كويتية مثل الخال و الميم والجيكر

سعر الجنجفة 5 دك ويمكنكم طلبها عن طريق هذا الرابط

Playing Cards

برنامج (مطبخي بغربتي) من إعداد شباب يدرسون في الخارج و اليوم يقدمون لنا طريقة تحضير مرقة ربيان بالتفصيل من المقادير إلى الشكل النهائي للوجبة، البرنامج من تقديم أحمد الجزاف و أحمد الجناعي ، تصوير هاشم الشطي ، تصميم و مونتاج أحمد الفيلي ،مساعد المخرج عبدالعزيز الخرس