TMobile logo

أثناء تواجدي في بوسطن ومع ارتفاع سعر النت في الفندق مثل ماذكرت بالموضوع السابق للرحلة، قررت أني أشتري خط مع خدمة النت وأشبك فيه بالموبايل والكمبيوتر عن طريق تشغيل ميزة  الهوت سبوت اللي تخلي الآيفون يبث شبكة وايرلس وممكن اي جهاز يشبك عليه ويستخدم النت اللي فيه، هالطريقة استخدمها وايد بالكويت

Iphone hotspot

لكن لسوء الحظ بعد ما شريت الخط بـ 70 دولار أي مايعادل 21 دك اتضح لي بعد ما ركبته أن ميزة الهوت سبوت تختفي من الآيفون، مع العلم أني طلبت من موظف تي موبايل أني أبي الخط عشان اشغل الهوت سبوت عليه وقالي راح يشتغل، المهم رجعت حق نفس الموظف وبلغته بالمشكله وماعرف يحلها، وقالي ماكو الا انك تاخذ جهاز هوت سبوت (مثل الأيقو) مال شركة زين، وشريته بعد مناقشات طويلة، قلت أحسن بعد عشان اشبك كل الاجهزة مرة وحدة، ورحت الفندق اجرب الجهاز ولا مايشتغل، ورجعت حق نفس الموظف اليوم اللي وراه وبلغته بالمشكله وقلت له انا ياي استانس مو ياي احل مشاكل شركتكم، يا تشغلونه لي او ترجعون فلوسي، وبالنهاية رجعولي فلوسي لول يعني حتى اهما مايعرفون يشغلون الجهاز مالهم، آخر شي قلت مالي الا النت مال الفندق مع ان غالي ( 15 دولار باليوم حق كل جهاز يشبك) بس قلت شسوي بعد اقضب مينونك.. وشبكت بالفندق ساعة وبعدها فصل وماقام يشبك!! ونزلت لهم اشرح لهم الموضوع وعلى طول عطوني كوبون مجاني عشان اشبك بالنت طول فترة إقامتي بالفندق كتعويض للمشكلة.. صج أنهم لوعوا جبدي بس طلعو شقردية الأمريكان اللي بالفندق، ماتوقعت ان تصيرلي هالمشاكل مع النت خصوصاً بديرة متقدمة مثل أمريكا.. الله يخلي زين وخدماتها، ركب الخط وكل شي شغال عندك