تخرجت من الثنوي؟ ألف مبروووك بس الحين لازم تقعد مع نفسك وتفكر بقرار مصيري اللي أهو إختيار التخصص في الجامعة، أغلب الطلبة يبون يدشون الجامعة بس مو عارفين شنو التخصص اللي يناسبهم فقلت أكتب هالبوست عشان أساعدهم في إختيار التخصص المناسب، أول شي ناخذها من نظرة عامة، عندنا جامعة الكويت و جامعات خاصة، كل جامعة فيها كليات و كل كلية فيها تخصصات معينة، مثلا كلية العلوم الإدارية فيها هالتخصصات (إدارة نظم المعلومات، إدارة، تسويق، محاسبة وغيرهم بس هذيل أهم شي) راح أتكلم عن هالكلية عشان لايصير الموضوع طويل وايد

تخصص الإدارة يخليك تشتغل بقسم الإدارة بشركة معينة، ممكن تصير متدرب ويرقونك

تصير مساعد مدير وبعدين تصير مدير، المدير يكون عنده صورة كاملة عن المشروع اللي

تسويه الشركة، مثلا متى يبدي المشروع؟ متى يخلص؟ جم يكلف؟ جم عامل يحتاج المشروع؟ ويتابع كل هالنقاط ويحاول يمشي على جدول المشروع، في مشاريع تطول شهرين وفي مشاريع تطول سنة، والمدير لازم يكون عنده علم في إدارة المخاطر، مواد هالتخصص أغلبها مواد متعلقة في الإدارة،

تخصص إدارة نظم المعلومات يدمج بين الإدارة و الكمبيوتر، يخلي الطالب يعرف شلون

يصمم مواقع حق الشركات وشلون يسوي بزنس على الانترنت، يتكلم عن التجارة الإلكترونية وشلون تربط الإدارة بالكمبيوتر والإنترنت، مواد هالتخصص تخلط بين مواد الكمبيوتر و مواد الإدارة، وهذا تخصصي احم احم لول

تخصص المحاسبة يخلي الموظف يحسب أرباح و مصاريف الشركة بشكل دقيق جدا

وفي مواد إقتصاد وحسبة القروض وبنوك وجذي، كله رياضيات، اللي مايحب رياضيات لا يتخصص محاسبة

تخصص التسويق يخلي الموظف يعرف شلون يسوق منتجات الشركة وشلون يحط إعلانات ويخليها تجذب إنتباه الناس، وشلون الواحد يتعامل مع الزباين المختلفين وشلون تبيع منتجاتك حق دول مختلفة، و شلون تعرف حاجات الناس علشان تلقى فرص استثمارية

كل التخصصات الموجودة تكون معاشاتهم من 850 إلى 1000 دك ماعدى كلية الهندسة والطب يكونون أكثر من الباجي

في سؤال وايد يسألونه الطلبة، شنو التخصص اللي معاشه عالي غير عن الهندسة والطب؟ أنا أقولكم تره كل التخصصات نفس المعاش واذا بيفرق راح يفرق شي بسيط، انت يا الطالب راح تدش الجامعة وتدرس 4 سنين عالأقل فأنصحك أنك تختار التخصص اللي تحبه مو التخصص اللي معاشه عالي، لأنك إذا ماتحب التخصص ماراح تجابله وتدرسه، ماراح يكون لك خلق تقرا الكتب ويمكن تعيد مواد وتتأخر، فمن أولها أخذ تخصص تحبه، وإذا واحد متردد شنو يتخصص أقوله أنسى الجامعة وفكر بحياتك لما تشتغل، شوف شنو تبي تشتغل؟ شنو تتخيل نفسك بعد 5 سنين؟ طيار؟ طبيب؟ مهندس؟ محاسب؟مدير؟ شوف شنو تبي تشتغل وبعدين دور على التخصص اللي يخليك تشتغل الشغلة اللي تبيها

طولت عليكم، بالتوفيق لكل المتخرجين وانشالله أكون ساعدتكم في إختيار التخصص ولو بشي بسيط