أمس جربت مطعم بوت بيلي في مجمع الأفينيوز، مكانه خلف حوض السمج اللي صوب الفوود كورت، أول ماوصلت خذيت طاولة وعطوني المنيو، بعد فترة نطرت الجرسون أييني عشان أطلب بس محد يه، ولما كلمتهم قالولي أنت لازم تروح تطلب بنفسك من الكاشير! بعدين استوعبت أنهم يتبعون نظام يديد ورحت أطلب

كان المطعم مزدحم شوي وصفيت دور

أول شي راح تلقون ثلاجة البيبسي والماي وبعض مشروبات الطاقة، تاخذون اللي تبونه وتنتقلون حق الخطوة اللي بعدها

الخطوة الثانية تختارون نوع الصمونة هل كبيرة أو صغيرة؟ خبز أبيض أو أسمر؟ وبعدها تختارون نوع الوجبة دياي، لحم وغيرهم

الخطوة الثالثة تختارون الإضافات من خس، طماط، مايونيز، رانش و زيتون وغيرهم

وبالنهاية تحاسبون عند الكاشير، أول ماطلبت منهم التصوير تزهبو على طول لول، حسيتهم مجربين من قبل مو أول مرة أحد يصورهم

وجبة الجريلد تشيكن (عاليسار) حلوه وخفيفة، وعاليمين وجبة الريك، ديك رومي و بيف هم لذيذة

الفاتورة طلعت بـ 4.600 دك شامل صمونتين + 2 بيبسي, السعر مناسب ومعقول

وهذا المنيو حق اللي حاب ياخذ فكرة عن المطعم ونوعية الوجبات، تجربتي كانت ناجحة مع بوت بيلي وأقدر أقول أنه مثل مطعم (سب واي) بس مطور، تقييمي له 9/10 بس في إنتقاد بسيط عليهم، أن الطاولات يم بعض وصاير شوية ضيج خصوصاً أن في عوايل يدشون ومعاهم عربانة الياهل وياخذون مكان من الممرات