أخيراً تم إضافة حاويات قمامة في شارع المطاعم أمام كل مطعم، حيث كانت الأوساخ تغطي الشارع خصوصاً في عطلة نهاية الأسبوع، مع إن هالإجراء ياي متأخر لكن يزاهم الله خير

الواحد قبل كان يخاف يطلب من بره بسبب عدم نظافة بعض المطاعم، الحين والله الواحد يخاف يشتري الييدام ويطبخ بالبيت من كثر مانسمع عن هاللحوم والمنتجات الفاسدة، مادري شلون يفكرون هالتجار!؟؟ ماتخاف تاكل من هاللحم بالغلط!؟ إذا مو أنت ولدك ممكن ياكله أو ربعك أو أي أحد من أهلك، بس هذا الطمع ومايسوي، حسبي الله ونعم الوكيل.. الله يخلي رجال البلدية اللي مفتحين عيونهم على هالمنتجات، يعطيهم ألف عافية، الواحد يرتاح لما يسمع أن البلدية شغالة وقاعدين يصادرون المنتجات الفاسدة، بس بنفس الوقت يخاف يكون في منتجات ما صادروها ليلحين والناس تشتري وتاكل.. الله كريم

مريت شارع المطاعم عشان آخذلي عصير من شموع الأفراح واللي اهو احسن مطعم بهالشارع، جان ألاحظهم شايلين الأرضية اللي عند المطعم وقلت لهم مبروك على الترميمات، وردو علي قالو هذا من البلدية قالولنا شيلو الأرضية، البلدية عليهم سوالف مرات، في واحد من الأهل عنده محل وفي مظلة فوق سطح المحل طولها متر يعني من ضمن مساحة المحل، يو البلدية قالوله ياتشيلها يانخالفك، حتى أصحاب المحلات اللي مطبقين القانون متلعوزين مع البلدية! بس بالنسبة حق شموع الأفراح زين جذي صار في مساحة حق السيايير

لجنة التعدي على أملاك الدولة كانت عاطلة هاليومين، جان يحطون حرتهم على المحلات الخارجية في جمعية الرميثية

ليش؟ لأن واجهة المحلات بارزة شوي وماخذه مكان من بره!! يقولون لازم تكون واجهة المحلات بشكل مستقيم! ولازقين لزقتهم المعروفه والمشهورة على كل المحلات، شكلهم صار مو شي جنه أصحاب المحلات أهما اللي مخالفين ماجنه الجمعية أهي اللي مسوية هالتصميم لول