سعود الورع مذيع قناة سكوب قابل 2 شباب معاقين ذهنياً أهلهم منفصلين وكانو

ساكنين مع أبوهم و مرت أبوهم كانت تعذبهم وتخليهم ينظفون الحمامات وماتعطيهم

فرصة عشان يستانسون حالهم حال أي شباب بعمرهم ، ومن كثر الظلم اللي أهما

فيه طلعو من بيت أبوهم وسكنو مع واحد من ربعهم ، وبعد فترة طلعو من سكن

صاحبهم و مالقو مكان ينامون فيه ولما عرف المذيع قصتهم أنفجر من البجي على

الهوا و ماقصرو أهل الكويت قامو يدقون على البرنامج و كل شخص كان يحاول أن

يتبرع لهم بمبلغ مادي أو سكن خاص فيهم .. و لما درو جيران أبوهم أن هالشباب

على الهوا دقو على البرنامج وشرحو شلون كان أبوهم يظلمهم وكانو الجيران يكلمونه

بس كان الأبو يقولهم مالكم شغل هذيل عيالي لا تتدخلون !!! وأمهم متزوجه وماتدري

عنهم ، صارلها 6 سنين مو شايفتهم .. بعد فترة دقت الأم وقالت لهم أنتو وينكم أبيكم

وبييكم الحين باخذكم !! بعد كل هالسنين تسأل عنهم ؟ والمذيع يقولها يعني لازم

يطلعون على الهوا عشان تسألين عنهم ؟ والله قضية تعاطف لها كل إنسان عنده قلب

وصارت قضية رأي عام وتبنى القضية محامي قناة سكوب ، وماقصر المذيع سعود

الورع اللي قاعد يحاول يساعد هالمساكين ، كله في ميزان حسناتك يا سعود .. أخليكم

مع مقطع من المقابلة مع أن مو واضح وايد بس ماعليه إنشالله بحصل المقابلة واضحة

وأحطها لكم هني .. انشالله ياخذون حقهم ويعيشون بأمان حالهم حال باجي الناس

مع أن الكويت و دول الخليج كلهم كانو متعاطفين معاهم لأن وضعهم جداً صعب

بس بنفس الوقت هالمقابلة كشفت عن شي حلو .. كشفت عن طيبة أهل الكويت

و وقفتهم حق المحتاجين ، في ناس قامت تدعي لهم وناس تتبرع لهم بفلوس

حتى في ولد صغير دق على البرنامج وقالهم انا اتبرع لكم بلاب توبين حق جمال

و عبيد ، شي يفرح صراحة و يأكد على أن الدنيا بخير و عيال الحلال تارسين الديرة

تحديث: لمشاهدة المقطع الثاني من المقابلة إضغط هنا