عبدالعزيز أحد أصدقائي، كلمني  وطلب نشر سالفته مع العمليات، وأنقل لكم قصته بلسانه ويقول: منطقة جابر العلي كل يوم يصير فيها تقحيص بالليل وإزعاج بالمنطقة كلها، وخاصة اللي لاعبين بقزوزات سياراتهم عشان يصير الصوت عالي

مانقدر ننام بالليل من الصوت، ويبدون من الساعة 3:00 الفير لي 8:00 الصبح، وإذا طق شوي مطر إنسى إنك تنام، الكل يقحص وبكل وقت، وآخر مشكلة صارت أمس الساعة 2:00 الفير، إتصلنا على العمليات قلنالهم في صوت تقحيص و موقادرين ننام، قالو قطعة 8؟ قلنالهم أي، قالولنا واصلنا خبر وإحنا طالعين لهم الحين نوقفهم عند حدهم، طبعاً نطرنا ساعة إلا ربع يالله وصلوا، بس المشكلة الشباب وقفوا تقحيص 5 دقايق وردو حق التشفيط، رديت إتصلت عالعمليات وهذا الحوار اللي دار بينا

عبدالعزيز: ليلحين يقحصون ليش تشغلون الصفارة؟ يسمعونها وينحاشون قبل لا توصلون
العمليات: مانقدر نصيدهم بدون الصفارة، وأول مايسمعونها ينحاشون والقانون يمنع المطاردة
عبدالعزيز: إنزين شنو الحل؟ تخلونهم يسرحون ويمرحون ويضايقون العالم؟
العمليات: إحنا مانقدر نسوي شي، إتصل على مخفر جابر العلي
عبدالعزيز: ممكن رقمهم؟ خذه رقمهم وشك إن هالرقم بمنطقة جابر العلي وسألهم شهالرقم؟
العمليات: هذا رقم مخفر العميرية، دق عليهم وأخذ رقم مخفر جابر العلي
عبدالعزيز: “طبعاً طارت النومة واتصلت على العميرية”: السلام عليكم، أخوي بغيت رقم مخفر جابر العلي
العمليات: منو أنت؟ شتبي؟
عبدالعزيز: لا بس في شباب يقحصون
العمليات: وإحنا شكو؟ أنت شتبي بالضبط؟
عبدالعزيز: لا بس بغيت رقم مخفر جابر العلي عشان أبلغ

وطبعاً ماساعدونا لاطبنا ولا غدا الشر، ماكان لي غير أني أكتب بتويتر وأشتكي يمكن يوصل صوتي والمشكلة هالحالة من سنين وعندهم أماكن مخصصة للتقحيص ويسكرون الشوارع ويشتغلون هرنات كل يوم والشرطة نايمين مايسوون شي، أكيد عندهم خبر لأن مو بس أنا مبلغ، لكن الشكوى لله ومانقول إلا حسبي الله ونعم الوكيل

شرايكم بسالفة عبدالعزيز؟ شنو الحلول اللي تقترحونها وشلون تتصرفون لو كنتو مكانه!؟