كنت مار مجمع 360 أمس مع الربع ورحنا صوب المطاعم نتعشى، واحنا نمشي قالي واحد من الشباب شوف هالولد شمسوي بشعره!؟
مسوي تسريحه غريبة عجيبة وكل الناس يتلفتون عليه، المهم طلبنا من أحد المطاعم ويينا ندور طاولة، جان أقولهم أمشو خل نقعد يمه، وقعدنا يمه وكلينا جان أسلم عليه ودار بينا هالحوار
أنا: شلونك أخوي شخبارك؟
أهو: الحمدلله بخير
أنا: بس حبيت آخذ من وقتك شوي وأسألك شلون سويت شعرك جذي !!؟
أهو: بالحلاق قلت له سولي وسوالي
أنا: أوكي بس شمعنى أخترت هالقصة وهالتسريحة!؟
أهو: يت على بالي و دورت بالنت على قصات جديدة لما أعجبتني هالقصة
أنا: وصبغته بالحلاق !؟
أهو: أي الصبغة عبارة عن خلطة “ماجيك” يايبها من دبي
أنا: يعني ماكو منها هني؟
أهو: لا خلطة “ماجيك” ماكو منها بالكويت يبتها من دبي حتى شوف الألوان على شعري فيه أكثر من لون أصفر وذهبي وياي على أحمر شوي
أنا: أها.. أنزين أنا عندي مدونة على النت، ممكن أصورك وأكتب عن تجربتك مع هالقصة؟
أهو: لا يامعود وايد قالولي بيصورون معاي بس ماحب، مالنا خلق ينشرون الصور بعدين بين الناس
أنا: عادي مافيها شي، نفس الشي أنت طالع الحين وكل الناس قاعده تشوفك!!؟
أهو: لا بس ماحب
أنا: أنزين الوالد يدري أنك مسوي هالتسريحة؟
أهو: أي عادي
أنا: عيل ليش ماتبي أحد يصورك؟ لا تخاف ماراح يبين ويهك
أهو: خلاص أوكي صور
أنا: أنزين الحين الناس كلهم يخزونك، شنو شعورك واهما يخزونك جذي؟
أهو: عادي في ناس عاجبها وفي ناس موعاجبها، وفي ناس يحشون ويتشمتون وأنا آخذ حسنات
أنا: لول أوكي، وبالمدرسة مايقولون لك شي؟
أهو: خل أداوم أول لوول، وحتى إذا داومت مايقولون شي عندي واسطة
أنا: أوكي ممكن أكتب عن تجربتك بالموقع؟
أهو: شنو تبي تقول يعني؟
أنا: بعرض الموضوع وشوف تعليقات الناس اللي تييك
أهو: أوكي
أنا: يعطيك العافية، نشوفك على خير أخوي
