فلم “وومان إن بلاك” من الأفلام الأخيرة اللي شفتها بالسينما، فلم رعب من الدرجة الأولى، قصته عن بيت مجهور يبون يبيعونه ويطرشون المحامي علشان يدقق بالمستندات اللي داخل البيت، ويكون المحامي مجبور على هالشغلة لأن ماعنده مصدر دخل ثاني وعنده ولد يبي يربيه ويهتم فيه، ويكتشف مع الوقت أن البيت فيه روح شريرة وكل شخص يشوف هالروح يموت طفل من أطفال المدينة، ويبدون أهل المدينة يحقدون على المحامي لأن كل مرة يشوف الروح الشريرة ويموت طفل من أطفالهم، ويحاول المحامي أن يعالج الموضوع بأجواء مليئة بالرعب
هاذي دعاية الفلم، الفلم كلللش مو حق اليهال، أنا نقزت جم نقزة المخرج مايغشمر يا جماعة لول
شفت هالفلم اليوم، قصته عن أثنين يتقابلون بالصدفة ويتزوجون ويحبون بعض وايد وكل شي من أروع مايكون، لكن تتعرض الزوجة لحادث يخليها تفقد الذاكرة وآخر شي تتذكرة أهي الأحداث اللي صارت لها بمرحلة الثانوية واللي بعد هالمرحلة ينمسح من ذاكرتها، ويحاول زوجها أن يرجع لها ذاكرتها بطرق مختلفة
هذا التريلر، الفلم رومانسي ومقتبس عن قصة حقيقية، تقييمي له 9/10
هالفلم يجمع مابين الرسوم المتحركة والواقع، قصة الفلم عن فرقة غنائية استعراضية مكونة من مجموعة من السناجب و يديرهم إنسان، يسافرون حق مسابقة عالمية علشان يشاركون فيها، وهما بالطريج يتعرضون حق مشاكل بسبب عدم مسؤولية أحد السناجب، الفلم جيد جداً للأطفال اللي أعمارهم من 5 إلى 9 ورسالته للأطفال يعلمهم أنهم لازم يسمعون الكلام علشان لايطيحون بمشاكل، لكن للأسف الرسالة مو واضحة 100%
فلم أكس لارج من الأفلام الهادفة مثل ما تعودنا من بطل الفلم أحمد حلمي، قصة الفلم عن شخص مفرط السمنة يعيش حياته بصعوبة
يجد صعوبة بالتنقل ولبس الملابس وفي الدخول بعلاقة مع الجنس اللطيف، وأسهل شيء بالنسبة له هو الأكل، ويحاول جاهداً أن يتغير للأفضل ويقلل من وزنه بأجواء كوميدية، مدة الفلم ساعتين ونص وتقييمي له 9/10
بعد ماكتبت آخر موضوع شاركنا الأخ وليد صاحب مدونة “كويت لول” ذكرياته ودزلي هالصورة على تويتر ويقول التذكرة البرتقالية تذكره بأول فلم دخله في لندن، أسم الفلم كلوفر فيلد، دخل الفلم بروحه وقاعد يشوف أول 20 دقيقة عباله الفلم وطلع 20 دقيقة كلها إعلان حق فلم ثاني لول
والتذكرة البيضة تذَكره بالأندر قراوند بلندن، يشرح الموقف ويقول مرو عليه قطارين رايحين حق نفس المكان اللي يبيه لكن ماكان يدري وضاع وقته
وآخر تذكرة حق سينما الكويت يقول كان راجع من السفر تعبان أهو و واحد من ربعه وبخاطرهم يدشون فلم ولما بدى الفلم نامو أثنينهم وقعدوهم عمال النظافة اللي بالصالة هههه خوش ذكريات بس كسرت خاطري يابوخالد أحسك ماستانست بكل مكان صاير لك شي لول، عالعموم مشاركة جميلة من أخوي وليد وشاكر له تفاعله وانشالله تستانس أكثر بالأيام اليايه
امس شفت الفلم الاماراتي سي شادو واللي مشارك فيه الفنان أحمد إيراج، قصته عن ولد على قد حاله يحاول يحب لكن ضايع و موعارف شلون يحب، وناقش الفلم تمسك بعض سكان الإمارات بالسكن في المناطق القديمة وعدم مواكبتهم للتطور، إخراج الفلم 7/10 لأن فيه لحظات سكوت طويلة، القصة أعطيها 5/10 لأن نهايتها غامضة وحزينة، توقعته أحسن من جذي
