بعد ماكتبت آخر موضوع شاركنا الأخ وليد صاحب مدونة “كويت لول” ذكرياته ودزلي هالصورة على تويتر ويقول التذكرة البرتقالية تذكره بأول فلم دخله في لندن، أسم الفلم كلوفر فيلد، دخل الفلم بروحه وقاعد يشوف أول 20 دقيقة عباله الفلم وطلع 20 دقيقة كلها إعلان حق فلم ثاني لول
والتذكرة البيضة تذَكره بالأندر قراوند بلندن، يشرح الموقف ويقول مرو عليه قطارين رايحين حق نفس المكان اللي يبيه لكن ماكان يدري وضاع وقته
وآخر تذكرة حق سينما الكويت يقول كان راجع من السفر تعبان أهو و واحد من ربعه وبخاطرهم يدشون فلم ولما بدى الفلم نامو أثنينهم وقعدوهم عمال النظافة اللي بالصالة هههه خوش ذكريات بس كسرت خاطري يابوخالد أحسك ماستانست بكل مكان صاير لك شي لول، عالعموم مشاركة جميلة من أخوي وليد وشاكر له تفاعله وانشالله تستانس أكثر بالأيام اليايه
كنا في مسرح الرقص في مدينة بلاك بول وأثناء رقص مجموعة من كبار السن وأنسجامهم مع الألحان، دخلت بنت صغيرة على المسرح و بدت ترقص باليه بينهم، جنه المسرح كله حقها لول، فاجأت الكل بجرأتها وبرقصها.. أتوقع لها مستقبل في رقص الباليه
تذكرون لما كتبت عن ناس يدعون للمسيحية في لندن، بعدها شفت ناس يدعون للثبات على الدين الإسلامي، بس المشكلة أنهم كانو يوزعون بروشورات بالعربي المفروض يوزعون بالانجليزي، مو متأكد إذا عندهم بروشورات انجليزية لأني كنت مستعيل بس هم زين منهم والله، الله يوفقهم
أمس وانا اطلب من كنتاكي لاحظت شاشة سامسونج وره الكاشير يعرضون عليها إعلانات كنتاكي، طريقة الإعلان وايد أحلا من الصور الثابتة وتشهي الواحد لما يكون يوعان، وانا واقف بالطابور كنت بطلب زينجر بس لما شفت الوجبة اللي عارضينها بالشاشة بغيت أغير رايي لول، بس اللي بقوله أن طريقة عرض الإعلان بالفيديو وايد أحسن من الصور وماتكلف وايد، كلها شاشة بـ 300 دك و شركة تصمم الإعلان خنقول 300 دك يعني المجموع 600 دك و مردود الإعلان يكون دبلات التكلفة
هذا قسم الطلبات السريعة في أحد مطاعم ماكدونالدز في لندن بجانب ساعة البيج بن، عبارة عن كاشير مفصول عن الباجي يخدم الطلبات السريعة جداً
هاذي شروط الطلبات السريعة جداً، يقولون اذا بتطلب بقسم الطلبات السريعة جداً لازم ماتطلب وجبة هابي ميل و ماتطلب طلبات معقده مثل اللي تكلمنا عنها من قبل
انا كنت بجرب الطلبات السريعة وكنت بشوف سرعتها، طلبت وجبتين ماك تشيكن والله يا جماعة خلال 45 ثانية ولا طلبي جاهز!!! استغربت أول شي عبالي الطلب مو حقي جان يقولي الموظف أن هذا طلبي لول، شوفو الساعة اللي بالصور، لما كنت صاف بالدور كانت الساعة 7:22 وخلال 45 ثانية خذيت طلبي وعلى مادورت طاولة و حطيت أغراضي وفتحت الكاميرا وصورت صارت الساعة 7:26 قلت يمكن الأكل مسوينه من زمان بس طلع الأكل حار وتوهم مسوينه.. خدمة عجيبة
Loading ...