بعد أسبوع من الآن سيتم البدء بفعاليات ملتقى أصحاب الأفكار الثاني والذي يهدف إلى تبادل المعلومات وبناء العلاقات بين أصحاب المشاريع الصغيرة
سيضم الملتقى 4 ورش عمل بمجالات مختلفة تساعد أصحاب المشاريع الصغيرة على التطور والإستمرار بمشاريعهم، ضيوف الملتقى وعنواين ورش العمل كالتالي
اليوم الأول 19/12/2011
د.ريهام الحميان: إدارة المشاريع الصغيرة
المحامي زيد الخباز: التعامل مع الشيكات والعقود
اليوم الثاني 20/12/2011
أ.علي مبارك: كيف تكون مبدعاً؟
م.خالد الزنكي: التسويق وإطلاق المنتجات
كما سيشارك رجال وسيدات الأعمال في هذا الملتقى لعرض تجربتهم للحضور ومنهم
السيد محمد العنجري صاحب ماركة دير آند دير للملابس
السيدة غدير خاجة صاحبة مطعم سالاد بوتيك
السيد سليمان قبازرد صاحب معهد تشالينج الصحي
السيد عبدالعزيز جوهر حيات صاحب مجلة هو و هي
وللمسجلين في ملتقى أصحاب الأفكار قبل تاريخ 16/12/2011 سيحصلون على ورشة عمل إضافية من تقديم م.خالد الزنكي يناقش بها كيفية تحويل الأفكار إلى مشاريع، وتكون ورشة العمل بتاريخ 21/12/2011
موقع يهدف لتسويق الفري لانسرز (أو الأشخاص الذين يعملون لحسابهم الخاص) يهدف الموقع لتشجيع الطاقات الشبابية على العمل ويقدم لهم خدمات التسويق والإنتشار عن طريق ذكر مشروعهم الشخصي في الموقع مع نبذة بسيطة عن المشروع وبيانات الإتصال لكي يصلون لأكبر شريحة عدد ممكن من المهتمين بهذه الشريحة، يقدم الموقع هذه الخدمة مقابل رسوم معينة
تلقيت دعوة من شركة كيوبيكال سيرفسز لخدمات المشاريع لأخذ جولة صغيرة في الشركة والتعرف على خدماتهم و مميزاتهم، في البداية دخلت عند الريسبشن و رحب فيني الأخ مجبل القطان و باشرنا الحديث بعد ماطلبت قهوتي الفرنسية، و شرح لي نشاط شركة كيوبيكال سيرفسز اللي تخدم أصحاب المشاريع الصغيرة من مرحلة تأسيس المشروع الى التوسع به حسب طموحك و اول خدمة كانت من ناحية عمل الدراسات الأوليه و تحديد طرق تطبيقها و من ثم التطبيق عن طريق خدمات عديده أولها تعيين مدير أعمال يساعدك بتطبيق تصوراتك على ارض الواقع و ارشادك الى الطرق المهنيه في التعامل مع السوق و خدمة المراسلات التي يحتاجها مشروعك سواء كانت هالمراسلات بالكويت ولا بره. وعندهم خدمة توفير مكاتب مزودة بأنترنت و لاب توب وخدمة الكانتيين و قاعات الإجتماعات ، وكل هذا على حسب حاجة العميل – إضغط هنا للتفاصيل
اليوم العصر كان عندي إستشارة لمدة ساعة عند الأستاذ خالد الزنكي، هالإستشارة ضمن برنامجه التدريبي للمشاريع، كنت أستشيره لتسويق موقع أصحاب الأفكار وعطاني أفكار لتسويق المشروع ماكانت على بالي كلش، وبعضها أفكار ماتكلف شي، كنت حاطلي ميزانية للإعلان حق الموقع بس الحين الحمدلله الميزانية راح تقل لأني ما أحتاج أقط مبلغ كبير على الإعلانات إذا طبقت الخطة اللي حطيناها مع بعض حق مشروع أصحاب الأفكار، قبل لا أزور الزنكي في برج الراية مريت المكتبة وشريتلي الكراسة اللي تشوفونها على الطاولة عشان أسجل عليها كل الملاحظات اللي آخذها في البرنامج التدريبي، خذيت لي كراسه لأن البرنامج مدتة 6 شهور فمايكفي دفتر صغير لول، بقولكم شيصير معاي في هذا البرنامج أول بأول انشالله
تم بحمدالله إفتتاح موقع “أصحاب الأفكار” المتخصص لأصحاب المشاريع الصغيرة والذي يحتوي على الأقسام التالية: أخبار عالم المال والأعمال، استطلاع الرأي، المشاريع القائمة، أفكار لمشاريع صغيرة جاهزة للتطبيق، دروس في الأدارة والتسويق وتطوير الذات، مقابلات مع رجال و سيدات الأعمال، وانشاء الله سيكون هناك تحديث مستمر للموقع – إضغط هنا لزيارة موقع أصحاب الأفكار
ياتني استفسارات كثيرة عن مشروعي “أصحاب الأفكار” و أغلب الإستفسارات كانت تطلب توضيح عن المشروع، فقلت أكتب عنه عشان تكون الصورة واضحة، موقع أصحاب الأفكار عبارة عن منتدى متخصص لأصحاب المشاريع الصغيرة، أقسام المنتدى متنوعة مثلا في قسم الأفكار، ممكن أي شخص يدش هالقسم ويشوف شنو الأفكار اللي ممكن يتبناها ويشتغل فيها كمشروع صغير، و في قسم المشاريع القائمة، كل صاحب مشروع يقدر يكتب بهالقسم ويعرف الناس على مشروعه الخاص وتكون مثل دعاية حقه وحق مشروعه، وقسم الدروس اللي يحتوي على دروس في الإدارة والتسويق و تطوير الذات، و قسم المقابلات راح يكون فيه مقابلات مع أصحاب المشاريع ومع رجال و سيدات الأعمال ، وآخر قسم مخصص لإستطلاع الراي وراح يكون فيه تصويت واستبيان عن مواضيع مختلفة
في ناس يقولون لي احنا ماعندنا مشاريع يعني مايصير نسجل؟ أقولهم أمبلى أكيد تقدرون تسجلون مو شرط يكون عندكم مشاريع، المهم يكون ميولكم صوب البزنس وتقدرون تتابعون المواضيع وتستفيدون
هذا المختصر المفيد عن المشروع وانشالله مع زيادة عدد المشتركين راح تشوفون إضافات أكثر تفيد أصحاب المشاريع، مو بس أون لاين .. أوف لاين بعد
المنتدى راح يفتح شهر 7 واللي حاب يستلم تبليغ عن إفتتاح المنتدى قبل لا أعلن عن الإفتتاح الرسمي يقدر يسجل بالقائمة البريدية وراح يكون من أول الناس اللي توصلهم أخبار المشروع أول بأول
ملاحظة: نموذج التسجيل اللي في الرابط أعلاه غير عن اللي موجود على يسار المدونة
اللي بالوصلة اللي فوق مخصص حق أخبار مشروع أصحاب الأفكار
أما اللي عاليسار ( اللي فوق التصويت بالمدونة ) مخصص لأخبار المدونة
فاللي سجلو بالفورمه اللي عاليسار ماراح يستلمون أخبار مشروع أصحاب الأفكار، لازم يسجلون بالفورمه اللي بالوصلة عشان توصلهم أخبار المشروع اليديد أول بأول
قبل جم يوم كانو يتكلمون عن المشاريع الصغيرة في برنامج نغم الصباح على مارينا أف أم، وحبيت أشارك معاهم و أتكلم عن المشروع اليديد “أصحاب الأفكار” المتخصص لأصحاب المشاريع الصغيرة، إضغط هنا لزيارة موقع أصحاب الأفكار
