اليوم الثاني في مؤتمر التسويق الإلكتروني و مواقع التواصل الإجتماعي، أول ماقعدت ولا يعرضون صور حق مواقع التواصل الإجتماعي مثل البلوقات و الفيس بوك و يوتيوب على ما أيوون كل المشتركين في المؤتمر، كنت متحمس ومستعد لتسجيل أي معلومة يديدة بالنوته اللي عندي
هذا بول ليمبرج اللي تكلم عن كيفية مضاعفة أرباحك في البزنس بغض النظر عن المشروع اللي عندك، وتكلم عن كيفية عمل عروض ترويجية و شلون ترجعون الزباين اللي خسرتوهم، وحده من طرق مضاعفه الأرباح اللي تكلم عنها يقول زيد سعر البضاعة اللي عندك شوي 5% تقريبا و عط الزباين كفالة على بضاعتك، جذي مو قاعد تصرف وايد بس قاعد تربح وايد لأن أغلب الناس يبون كفالة بس مو كلهم يستخدمونها، و بعد طريقة ثانية يقول تقدر تزيد أرباحك عن طريق إضافة إكسسوارات على بضاعتك وتسأل الزبون إذا يبي هالإكسسوارات حق البضاعه اللي شراها، مثلا واحد شره منك تلفزيون تقوله مثلا عندنا عرض إذا خذيت التلفزيون مع سماعات يطلع عليك أرخص من شراء السماعات بوقت ثاني بعدين، أشترهم أثنينهم الحين وأستفيد من العرض، اوكي قاعد أحاول أتذكر شغلات بعد ممم أي نفس المطاعم مثلا لما نطلب وجبة و يسألونا إذا نبي سلطة أو كيكة أو برد، هالإضافات مو قاعده تكلف المطعم وايد بس هالمطعم قاعد يزيد أرباحه لما مجموعة من الزباين توافق على العرض وتطلب السلطة أو أي شي ثاني
بالبريك قعدت مع أخوي باسل العثمان ( بالصورة عاليسار ) وقعدنا نسولف عن المواضيع اللي تكلمو عنها بالمؤتمر جان ينضم لنا خالد الزنكي و قعدنا نسولف عن الإنترنت و مواضيع مختلفة، مع السوالف طلع الزنكي ساكن بنفس الفندق اللي سكنت فيه ( هوليداي إن ) بعدين عرفت أن طيارته نفس طيارتي لول فلما خلصنا من المؤتمر وصلنا أخوي باسل المطار كلنا، وبالمطار على طول رحنا حق المطاعم كنا يواعه، لأن المؤتمر بريكاته قليله وكل بريك مدته 15 دقيقه تقريبا مايمدي الواحد ياكل، المهم قعدنا أنا والزنكي بمطعم وسولفنا عن التسويق الإلكتروني جان أكلمه عن مشروعي ( أصحاب الأفكار ) و مع السوالف قالي أن بيساعدني و بيعطيني محتوى جيد حق الموقع بس يبيله وقت شوي، في النهاية بس حبيت أشكر أخوي فيصل أبا الخيل اللي ساعدني بالتسجيل في المؤتمر و أخوي باسل العثمان هالأثنين والله ماقصرو قعدو معاي طول هاليومين ماحسسوني أني مسافر بروحي لول، وأشكر أستاذي خالد الزنكي على روحه الطيبه و إهتمامه بالشباب
اليوم الأول في مؤتمر التسويق الإلكتروني و التواصل الإجتماعي، أول ماوصلت فندق هوليداي إن شفت هذا الفلاير أو اللوحة الترحيبية بالمشتركين، ارتحت و حسيت أن الموضوع أكبر مما كنت أتصور لول، دشيت غرفتي وأول شي سويته طلعت اللاب توب وتأكدت أن الانترنت شغال بغرفتي وصلت الغرفه الساعه 1 تقريبا وعلى ما رتبت أغراضي و شوية اتصالات على الأهل إلا صارت الساعة 2 الفير ونمت 2:30 تقريباً
قعدت الصبح الساعة 7:30 لبست ودشيت مول الإمارات لأن المؤتمر كان بالمسرح اللي بالمول، أول ماوصلت حق المسرح ولا في تسجيل الأسامي، أو بمعنى أصح التأكيد على الحضور، وتفاجأت بعدد الأشخاص المسجلين، تقريبا 300 شخص، كان شي خيالي، ناس من دبي وناس من الخليج وناس يايه من الهند علشان تحضر المؤتمر ! شكلهم مسوقين له عدل، الحلو أن لما كنت صاف بالطابور علشان أأكد على حضوري قابلت أخت عزيزة كانت معاي بدورة فيفا للمشاريع الصغيرة، بعدين وصل أخوي فيصل صاحب مدونة سوبر كويت وعرفني على أخوي باسل مبرمج المواقع وحضرنا المؤتمر مع بعض
في بداية المؤتمر طلعو الـ 12 مسوق على الانترنت ( المتحدثين في المؤتمر ) و كل واحد عرفنا على نفسه وقالنا شنو راح يعلمنا، اليوم عطونا 6 محاضرات كل وحده مدتها ساعة تقريبا، وفي فقرات بين كل محاضره و محاضره يسوون فيها مسابقات أو حركات تنشط الجمهور عشان لا نمل لول
هذا سياران دويلي، أفضل محاضر بالنسبة لي باليوم الأول، عمره بالعشرينات و مدخوله آلاف الدولارات شهريا، شغله متخصص بالتسويق عن طريق الإحالة أو وسيط بين الزباين والشركات، يدور منتج مطلوب، يعرف الزباين عليه، يبيعلهم المنتجات أون لاين و ياخذ عمولته، الزين بهالطريقه أن ماعنده منتج ولا شي، يستخدم منتجات غيره ويسوقها ويربح عمولته، مع العلم أن متزوج وعنده عيال وعايش على هالشغله !! تلوموني ليش أحب التسويق الإلكتروني لول !؟
باجر حملة مقاطعة الموقعين، اللي يشوف المشاركة صعبة خل يخفف من نشاطاته بهالموقعين
شنو فايدة المقاطعة؟
في شركات تدفع حق هالمواقع عشان يحطون اعلانات مقابل كل ظهور حق الإعلان، والإعلان يطلع كل مره نزور فيها الموقع، مثلا في موقع يوتيوب كل مانشوف فيديو نلقا إعلان عاليمين، كل مانشوف فيديو يديد يتغير الإعلان و موقع يوتيوب يربح مبلغ بسيط مقابل كل ظهور حق هالإعلان، و لما نزور هالمواقع يزيد عدد تصفحها ويزيد عدد ظهور الإعلانات فيها، لما يقاطعونها مجموعة كبيرة من مستخدمي الإنترنت راح يقل عدد تصفح هالمواقع ويقل عدد الإعلانات اللي تطلع فيها ويقل عدد إيرادات الموقع، والقرار لكم
واحد من الشباب بالفيس بوك حط حلقة ساوث بارك عن الفيس بوك وقلت اشاركم فيها .. تره وايد ناس عانوو مثل ما عانه صاحبنا بالفيديو عشان يدشون ويشاركون بالفيس بوك، في ناس ماتقتنع بسرعه
