فلم درايف من الأفلام التي تعرض في سينما الكويت، تدور أحداث الفلم عن سائق يمثل المشاهد الخطرة في الأفلام مثل المطاردات وتقلب السيارات، وبعد الظهر يساعد العصابات في سرقاتهم حيث يلعب دور السائق الذي يساعدهم على الفرار من الشرطة بعد كل سرقة تحدث، فكرة الفلم جيدة ولكن الإخراج تعيس جداً والفلم كئيب و ممل لدرجة كبيرة، هناك فترات سكوت طويلة بالفلم ولو جمعنا الوقت الذي يتحدث فيه البطل لوجدنا أنه 10 دقائق فقط، الخلاصة.. لا أنصح بمشاهدته بالسينما ولا في المنزل
شفت هالفلم اليوم، قصته عن أثنين يتقابلون بالصدفة ويتزوجون ويحبون بعض وايد وكل شي من أروع مايكون، لكن تتعرض الزوجة لحادث يخليها تفقد الذاكرة وآخر شي تتذكرة أهي الأحداث اللي صارت لها بمرحلة الثانوية واللي بعد هالمرحلة ينمسح من ذاكرتها، ويحاول زوجها أن يرجع لها ذاكرتها بطرق مختلفة
هذا التريلر، الفلم رومانسي ومقتبس عن قصة حقيقية، تقييمي له 9/10
هالفلم يجمع مابين الرسوم المتحركة والواقع، قصة الفلم عن فرقة غنائية استعراضية مكونة من مجموعة من السناجب و يديرهم إنسان، يسافرون حق مسابقة عالمية علشان يشاركون فيها، وهما بالطريج يتعرضون حق مشاكل بسبب عدم مسؤولية أحد السناجب، الفلم جيد جداً للأطفال اللي أعمارهم من 5 إلى 9 ورسالته للأطفال يعلمهم أنهم لازم يسمعون الكلام علشان لايطيحون بمشاكل، لكن للأسف الرسالة مو واضحة 100%
امس شفت الفلم الاماراتي سي شادو واللي مشارك فيه الفنان أحمد إيراج، قصته عن ولد على قد حاله يحاول يحب لكن ضايع و موعارف شلون يحب، وناقش الفلم تمسك بعض سكان الإمارات بالسكن في المناطق القديمة وعدم مواكبتهم للتطور، إخراج الفلم 7/10 لأن فيه لحظات سكوت طويلة، القصة أعطيها 5/10 لأن نهايتها غامضة وحزينة، توقعته أحسن من جذي
فلم تن تن أو “تان تان” على قوله بعض الناس، والله توني أدري أنه تن تن مو تان تان، ترجمة غير موفقة للفريق اللي ترجم كرتون “تان تان” في السابق، المهم أن فلم “تن تن” راح يعرضونه بالكويت بتقنية آي ماكس إبتداءاً من الخميس 3/11/2011
وهذا تريلر الفلم شكله يسوه لأن الرسوم على مستوى عالي
وهذا الممثل جيمي بيل اللي أدى دور تن تن، والله فيه شبه من تن تن مو بعيد عنه
اليوم حجزت حق فلم “إن تايم” بعد ماقريت عنه، قصته عن زمن يعيشون فيه الناس وتكون عملتهم عبارة عن “وقت” يعني اللي عنده 24 ساعة يقدر يشتري كاكاو بـ 5 دقايق وياخذله مشوار بالتكسي وتدفعله ساعتين من وقته وجذي، بس إذا واحد خلص وقته يموت! فكرة الفلم قوية وممتازة والناس كلهم مندمجين بالصالة لدرجة أنهم قاموا يصفقون لما البطل ينقذ نفسه من الموت على آخر ثواني! الفلم قوي بس للأسف نهايته مو قوية خربت عليه
جوني إنقلش، فلم يعرض بالسينما من بطولة (رو وان أتكنسون، المشهور بأسم مستر بين) قصته عن عميل غبي بالإستخبارات الأنجليزية يحاول كشف عصابة دولية ودائماُ ينقذه التكنولوجيا من المصايب اللي يواجهها، الفلم أحسه نسخه كوميدية من أفلام جيمس بوند، البوستر والألحان بالفلم والسيارة والأدوات اللي يستخدمها تقريبا أقدر أقول تقليد لجيمس بوند
صراحة ماعجبني وايد توقعته أحلى وكوميدي أكثر لكن خاب توقعاتي، تقييمي له بشكل عام 8/10
