استلمت دعوة لتجربة مطعم سلط بوتيك، وعند وصولنا رحب بنا الأخ هاني مدير المطعم وأخترنا مكان الجلوس ثم وزعوا علينا المنيو وهو عبارة عن برنامج في الآيباد يعرض منتجات المطعم بطريقة منظمة
تم تقديم المقبلات وهي عبارة عن قطع خيار وجزر مع صلصة لذيذة
وطلبت شوربة إيدامامي كانت حلوة
مشروم سويس مع الخيار المخلل
أخوي طلب جريلد تشيكن، شكل الصمونة يشهي
تشيكن وينقز
تشيكن ناتشوز سالاد، طبعا أول شي لفت نظرنا أهو ديكور المطعم الفخم، القعدات مريحة جداً والجو هادي، مكانه في الأفينيوز تحت مكتبة ذات السلاسل، وحالياً إدارة المطعم تخطط لفتح فرع جديد في قطر بعد مافتحو فروع في جدة والبحرين
:الخلاصة
جودة الأكل ٨.٥/١٠
المكان والقعدة ٩/١٠
الخدمة ٩/١٠
كل الشكر للأخ علي العنزي والأخ هاني على الدعوة والترحيب ونتمنى لهم المزيد من التقدم والتوسع والنجاح
توني طالع من فلم “را ون” بطولة شاروخان، قصة الفلم عن مبرمج ألعاب ولده زهقان من الألعاب السهلة واللي يفوز فيها بسهولة، فيحاول يراضي ولده ويصمم له لعبة يكون فيها الشرير قوي ومايموت بسهولة
ومن قوة الشرير وبرمجته الذكية يطلع من اللعبة ويلاحق ولد المبرمج عشان يذبحه لأسباب معينة، الفلم طبعاً خيالي وايد وتقييمي له بشكل عام 4/10
جوني إنقلش، فلم يعرض بالسينما من بطولة (رو وان أتكنسون، المشهور بأسم مستر بين) قصته عن عميل غبي بالإستخبارات الأنجليزية يحاول كشف عصابة دولية ودائماُ ينقذه التكنولوجيا من المصايب اللي يواجهها، الفلم أحسه نسخه كوميدية من أفلام جيمس بوند، البوستر والألحان بالفلم والسيارة والأدوات اللي يستخدمها تقريبا أقدر أقول تقليد لجيمس بوند
صراحة ماعجبني وايد توقعته أحلى وكوميدي أكثر لكن خاب توقعاتي، تقييمي له بشكل عام 8/10
قريت كتاب “كراش إت” قبل فترة وحبيت أعطيكم فكرة عن جزئية اعجبتني في الكتاب، بجابتر 7 تكلم مؤلف الكتاب “قاري فاينرجك” عن التركيز على المشروع وغض النظر عن التفاصيل اللي ممكن تأخر المشروع وتعطل سيره، والحلو بهالنقطة أنه يحث على العمل المستمر بدون توقف، لما أفكر بهالجزئية أتذكر نفسي لما أنوي أشتغل على كذا شغله ويتعطل شغلي لأني أبحث عن الكمال والكامل الله سبحانه، لا للكمال التام ونعم للعمل والإنجاز، التفاصيل عن تجربتي مع الكتاب راح تشوفونها مصوره قريبا.. خلكم معانا
فلم نهوض أو نهضة القردة من الأفلام العلمية الممتعة، قصة الفلم عن شاب عالم بالكيمياء والهندسة الوراثية يطور عقار ينشط خلايا المخ ويخلي الشخص أكثر ذكاء وتتحسن ذاكرته بشكل كبير، يجرب هالعقار على الشامبانزي وبعد نجاحه يقررون تجربته على البشر، لكن هل له آثار جانبية!؟ هذا اللي راح تعرفونه لما تشوفون الفلم، تقييمي له 10/10
فلم زنداقي نا ميلاقي دو، قصته عن 3 شباب يبون يحتفلون بحفلة توديع العزوبية حق واحد منهم ويسافرون مع بعض ويجربون نشاطات أول مرة يجربونها بحياتهم مثل الغوص والسكي دايفنج والنحشة من الثيران، وتصيرلهم مواقف مختلفة برحلتهم، فكرة الفلم مشابهه نوعاً ما لفلم هانق أوفر، بشكل عام أعطيه 70% كتقييم
